اي واتش تكشف أسباب النزاع القانوني مع الجريء؟
نشر موقع اي واتش تدوينة كشف من خلالها سبب الإصرار على النزاع القانوني مع رئيس الجامعة التونسية لكرة القدم هذا نصه:
التقاضي الإستراتيجي: عركة وديع وأي واتش.
وديع يستعد باش يورث روحوا في رئاسة الجامعة. عمل جلسة عامة نقح فيها القانون على قياسو، بدل القانون الإنتخابي بش يكور وحدو، لم التزكيات الكل إلا ثلاثة جمعيات فقط رفضوا. تلمينا احنا وقلنا اش نجمو نعملوا؟
أول تحدي كان “إكتساب الصفة والمصلحة”. بعبارة أخرى القاضي بش يقلك “إنت اش مدخلك”. من هوني جات فكرة الترشح بقائمة “محاربي الفساد”… باش كان سألنا القاضي نقولولو “مترشحين” ونكونو هكا اكتسبنا الصفة والمصلحة. مشينا للجامعة ساعة قبل غلق باب الترشح. بعد ما ترشحنا قمنا بتقديم طعن في قائمة المنافس الأوحد وديع الجري. الطعن كان على خلفية التداخل بين السياسي والرياضي وجمع أعضاء في قائمة وديع للصفة السياسية والحزبية ألي يخالف كل قوانين كرة القدم والجمعيات في تونس وفي العالم. وبدات المعركة القانونية أو معركة الطعون.
اللعبة مع وديع كانت بالمكشوف. احنا باش نشكيو و هو باش يحكم ضدنا. أما أكثر من هكا، وديع باش يحكم برفض الطعون متاعنا شكلاً…علاش؟ خاطر هكك باش يحرمنا من التقاضي في مستوى أعلى وخصوصاً في “التاس” وفعلاً هاذاك ألي صار. كل الطعون ترفضت شكلاً. أما كيما قلتنا قبل، هذا الكل متوقع، هذاك علاش كل شي كان موثق والطعون كانت جدية الشي ألي خلا وديع والقانونجية متاعو يدخلوا بعضهم ويقوموا بعديد التجاوزات ألي مست شروط المحاكمة العادلة وأكثر من هكا.
ملي دخلنا العركة هذي كنا واضحين: ماناش باش نربحو في الجامعة خاطر لجانها غير مستقلة، احنا دخلنا نلعبو في طرح شطرنج، باش نلعبو معاه تحريكة بتحريكة. قدمنا الطعون أما زادة راسلنا النجم حول حسين جنيح. مشينا في الإستيناف أما زادة جرحنا في لجنة الإنتخابات من أجل تضارب المصالح. هذا الكل خاطر قاعدين نلمو في دوسي للطعن الخارجي يثبت سوء النية متع الجامعة…والجماعة ماكانوش ملعاكسين زادوا عطونا أكثر أسباب لتأكيد سوء النية من خلال عدم إحترام الأجال والإجراءات.
لكن في وسط العركة هذي الكل اكتشفنا انو تواصل منظومة وديع الجري مش مبني على الكفاءة متاعو مثلاً، هو فقط مبني على تداخل السياسي والرياضي: حماية راشد الغنوشي ألي بعثلو قبل رسالة مفتوحة و معاهم تحيا تونس ألي عمل معاهم الحملة الإنتخابية، حامي نفسو بمجموعة من القضاة ألي معينهم داخل الجامعة وأخيراً بمجموعة من الإعلاميين المنبطحين. وديع أول حاجة عملها حب يلم الموضوع إعلامياً وفشل ونجحنا ألي يولي موضوع ترشحنا في كل المنابر الإعلامية الرياضية. توا ما بقى لوديع كان انو يربح قانونياً ألي هو صعيب… الخطوات الجاية تو نحكو عليهم مرة أخرى.
#قائمة_محاربي_الفساد
